АҚШ-та 2016 жылғы Америка президенті сайлауына Ресейдің ықтимал араласуына қатысты тергеу ісін жүргізіп жатқан АҚШ арнайы прокуроры Роберт Мюллер елдің қазіргі президенті Дональд Трамптың бұрынғы сайлау штабының жетекшісі Пол Манафортқа жаңа айыптар тақты. Сонымен бірге Манафорттың Украина бойынша жұмыс істеген бұрынғы әріптесі, ресейлік бизнесмен Константин Килимникке де айыптар тағылды деп хабарлайды Reuters.
Мюллердің сөзінше, Манафорт пен Килимник Америка сайлауына Ресейдің ықтимал араласуына қатысты тергеу ісі басталысымен өзара сөз байласып, осы іс бойынша екі куәгерге қысым жасауға тырысқан. Ол куәгерлердің кімдер екені әзірше белгісіз. Бұған дейін де Мюллер Манафортқа осыған ұқсас айыптар таққан, бірақ ол құжаттарда Килимниктің аты-жөні аталмаған болатын. Ресейлік бизнесменнің өзі Мюллердің оған таққан жаңа айыптарына қатысты әзірге ешқандай комментарий берген жоқ.
Оқи отырыңыз: Трамптың сайлау штабының экс-басшысы істі болды
Пол Манафортқа қарсы сот процесі шілденің 24-і басталмақ. Трамптың сайлау штабының бұрынғы басшысына тіркелмеген шетелдік агент ретінде Украинаның бұрынғы президенті Виктор Януковичтің мүддесіне жұмыс істеген, сонымен бірге шетелдік шоттарды пайдаланып заңсыз қаржы операцияларын жасаған деген айыптар тағылған. Пол Манафорт өзіне тағылған айыптарды мойындамай отыр.
ПІКІРЛЕР