Ауыл шаруашылығы министрлігі қуаңшылық пен жем-шөптің жоқтығынан малы қырылған шаруалардың шығынын мемлекет өтемейді деп мәлімдеді. Соңғы мәлімет бойынша, қуаңшылықтан көбірек зардап шеккен Маңғыстау облысында – мыңнан астам, Қызылорда облысында 500-ге жуық мал қырылған.
– Мұндай жағдайда өтелмейді. Бұл жеке шаруаның өз мәселесі. Қазақстан заңнамасына сәйкес, мал шығыны тек қана эпизоотиялық жағдай орын алса ғана төленеді. Басқа жағдайда ол төленбейді, – деді жұма күні журналистердің сұрақтарына жауап берген ауыл шаруашылығы министрлігінің аппарат жетекшісі Марат Оразаев.
Оның сөзіне қарағанда, Қазақстан шаруаларында малды сақтандыру мүмкіндігі бар. Бірақ әзірге фермерлерге бұл нәрсе таңсық болып отыр.
– 2020 жылдың басынан бері Қазақстанда ерікті түрде сақтандыру туралы заң қабылданған. Сондықтан, егер шаруа бизнесінің тиімділігін ойласа, өзінің мал басын эпизоотиялық жағдайда кезінде шығын болуына немесе осындай табиғи жағдайдың салдарынан шығын болу мәселесінен сақтандыра алады. Әзірге бұл жаңа тетік болғаннан кейін, шаруалар оған әлі толығымен бара алмай жатыр. Бірақ бұл тетік алдағы уақытта өзінің қажеттілігін көрсетеді деп ойлаймыз, – деді ол.
Ведомство өкілдерінің айтуынша, қазір мал азығын дайындау үшін республикалық штаб құрылған. Қуаңшылық қатты қысқан Маңғыстау мен Қызылорда облыстарына басқа аймақтардан жем-шөп тасымалданып жатыр. Бұған дейін басқа өңірлерден Арал ауданына – 40 тонна, Маңғыстауға 1000 тонна шөп жеткізілген. Одан бөлек, Маңғыстауда 2 мыңнан астам жылқы көрші облыстарға жеткізілген.
Бірақ министрлік елде төтенше жағдай жариялау мәселесі шілдедегі жауын-шашын мөлшеріне байланысты шешіледі деп отыр. Онда да ел бойынша емес, қуаңшылық байқалған өңірлерде ғана жарияланады.
Қарай отырыңыз: Маңғыстау облысын қуаңшылық қысып, жұрт малға "картон бере бастады" (9 шілде 2021 жыл).
Биыл Маңғыстау мен Қызылорда облыстарын құрғақшылық дендеген. Бұған дейін кейбір фермерлер жем-шөп сатып алып, малды қорада ұстауға жағдайы жоғын айтқан. Олар үкімет тез арада көмек бермесе, малдар жаппай қырылайын деп тұр деп ескерткен.
ПІКІРЛЕР