Украинадағы соғыс. 9-13 наурыз аралығында не болды?

Ресейлік әуекомпаниялар Қазақстанға рейстерін тоқтатты. Қазақстандық Air Astana компаниясы да Ресейдің кейбір қалаларына рейстер ұшырмайтынын, тек Мәскеуге ғана рейстер болатынын мәлімдеді.

Ұлыбритания алғаш рет Украинаға қару-жарақ берді

Ұлыбритания Украинаға әскери және қару-жарақпен көмектесті. Бұл туралы Ұлыбритания қорғаныс министрі Бен Уоллес мәлімдеді.

Яғни, Лондон Украинаға 3615 техника (танкіге қарсы қару, атыс қарулары, оқ-дәрі, байланыс құралдары) жеткізген. Британия Киевке көмек ретінде танкіге қарсы Javelin ракетасын да беруді қарастырып жатыр.

Ресей СІМ: Мәскеу Украина билігін құлатуды көздемейді

Ресей Украина билігін құлатуды көздемейді. Сәрсенбі күнгі брифинг кезінде Ресей сыртқы істер министрлігінің ресми өкілі Мария Захарова осылай деп мәлімледі. Соғыстың алғашқы күндері президент Владимир Путин Украина әскерін төңкеріс жасауға шақырған.

Захарованың сөзіне қарағанда, соғыстың мақсаты – "Украинаның Донбас аймағындағы ресейшіл сепаратистерді қорғау, демилитаризация, денацификация және Ресейге төнген әскери қауіпті жою". СІМ өкілі Ресей Украинаны жаулап алуды немесе оның мемлекеттігіне нұқсан келтіруді көздемейді деді.

Путиннің баспасөз хатшысы Дмитрий Песков 7 наурызда Мәскеу бейбіт келіссөз кезінде Украинадан Конституциясына бейтараптықты бекітуді, сепаратистердің тәуелсіздігін мойындауды және Мәскеу жаулап алған Қырымнан бас тартуын талап етеді деп айтқан.

Ресей қорғаныс министрлігі Украинадағы соғысқа әскери міндетін өтеуге шақырылған қатардағы солдаттар да қатысқанын мойындады.

"Өкінішке қарай, әскерге шақырылған қатардағы солдаттардың Украинадағы әскери операцияға қатысқаны жайлы бірнеше факт анықталды. Қазір қатардағы солдаттардың бәрі Ресей аумағына қайтарылды" деп мәлімдеді ведмство.

Ресей қорғаныс министрлігі "бірнеше қатардағы солдат тұтқынға түскенін" де мойындады.

Бұған дейін Ресей президенті Путин Украинадағы "әскери операцияға"* тек келісім-шартпен алынған әскерилер қатысып жатыр деген. Бірақ Ресейде ата-аналар әскерге шақырылған балаларының Украинадағы соғысқа аттанғанын айтқан еді.

*Кремль Украинаға ашқан соғысын "әскери операция" деп атап, "соғыс" сөзін қолданғандарды қудалап жатыр.