Грузия парламенті сайлауының ресми алдын ала нәтижесі қазанның 9-ы күні жарияланады деп күтіліп отыр.
Сенбі күні биліктегі «Грузия арманы – Демократиялық Грузия» партиясы өз есебіне жүгініп, сайлауда жеңіске жеткенін жариялаған. Партияның есебі бойынша, оған сайлаушылардың 58 пайызы қолдау білдірген.
Бұған дейін таратылған экзит-пол нәтижелерінің көрсеткіштері бір-бірінен өте алшақ болып шықты.
Сайлау өткен күні сайлау учаскелері жанында TNS Opinion компаниясы жүргізген сауалнама нәтижелері бойынша, биліктегі «Грузия арманы – Демократиялық Грузия» партиясына сайлаушылардың 54 пайызға жуығы дауыс берген. 19,5 пайыз дауыс жиған бұрынғы президент Михаил Саакашвилидің «Бірыңғай ұлттық қозғалыс» партиясы екінші орында тұр. Ал «Патриоттар альянсы – Біріккен оппозиция» сайлау блогына сайлаушылардың 5 пайызы сенім танытқан.
GfK компаниясы жүргізген экзит-пол қорытындысы бойынша, билік партиясы сайлаушылардың 40 пайызға жуығының қолдауына ие болса, Саакашвили партиясы 33 пайызға жуық, «Патриоттар альянсы» - 6 пайыздай дауыс жиған.
Алдын ала мәлімет бойынша, дауыс беруге жалпы сайлаушы санының 52 пайыздан астамы қатысқан.
Грузия парламентінің 150 депутаты 4 жыл мерзімге сайланады.
