Орал тұрғыны Бекболат Өтебаев бес күн қамаудан кейін бостандыққа шықты. Наурыздың соңында оны екі полиция қызметкері үйінен алып кеткен. Бекболат Өтебаев 25 ақпанда Оралда өткен әкелі-балалы Дулат пен Жанболат Ағаділдерді еске алу шарасына қатысқаны үшін әкімшілік жазаға тартылды. Дулат Ағаділ – былтыр Нұр-Сұлтандағы тергеу изоляторында жұмбақ жағдайда көз жұмған азаматтық белсенді, ал оның ұлы Жанболат кейін пышақ жарақатынан қаза тапқан. Мүгедектігі бар Өтебаев құқығы бұзылғанын айтып, қамауда аштық та жариялаған.