Әкімдік: Жарылыстан зардап шеккендер 66 адамға жетті, екеуі ауыр жараланған
Жамбыл облысындағы әскери бөлімшедегі қоймада болған жарылыстан зардап шеккендер 66 адамға жетті. Олар Тараз қаласындағы №1 аурухана мен Байзақ ауданы орталық ауруханасына жеткізілген. Бұл туралы облыс әкімдігі хабарлады.
Жараланғандар арасында әскерилер мен төтенше жағдай департаментінің қызметкерлері бар. Ауруханаға түскендердің екеуі ауыр жараланған, қалғандары жеңіл жарақаттанған.
Зардап шеккендерге көмек көрсету үшін 32 дәрігер мен 56 медициналық қызметкер жұмылдырылғаны хабарланды.
Облыс әкімдігі жарылыс болған аймаққа жақын ауылдардың адамдарын эвакуциялап жатқанын хабарлаған. Олар үшін Тараз қаласында 400 орын дайындалды.
Жамбыл облысы әкімдігі 26 тамыз 23:30-да "жарылыс бәсеңдегенін" хабарлады.
Қорғаныс министрі: Әскери қоймадағы жарылыстан 4 адам мерт болды
Жамбыл облысындағы әскери бөлімдегі қоймада болған жарылыс салдарынан 4 әскери қызметкер қаза тапқан. Бұл туралы жұма күні Қазақстан қорғаныс министрі Нұрлан Ермекбаев хабарлады.
- Олар – Оңтүстік [әскери] округ әскери прокуроры полковник Қапезов, келісімшарт бойынша қызмет атқарып жүрген сержант Марат Мешінбай, келісімшартпен қызмет атқарған ефрейтор Руслан Жанболатов және әскери күзет қызметкері Оразбек Дәлібаев мерт болды. Марқұмдардың жақын-жуығына әріптестерімнің атынан көңіл айтамын, - деді министр. Бейсенбінің кешінде билік жарылыстан қаза болғандар жоқ деп хабарлаған еді.
Министр Ермекбаев жарылыстан кейін бірнеше адамның хабарасыз кеткенін де айтты.
26 тамыз күні кешке Жамбыл облысы Байзақ ауданындағы қоймада өрт шығып, оқ-дәрі жарылған. Бірнеше күшті дүмпу байқалып, жүздеген адам жапа шекті, жақын маңдағы елдімекен тұрғындары көшірілді. Оқиғаның себебі анықталып жатыр.
- Авторы: Манас ҚАЙЫРТАЙҰЛЫ
Полиция мен әскерилер жарылыс болған аймақта жолды жауып тұр
Жамбыл облысындағы жарылыс болған аймақта жүрген Азаттық тілшілері полиция мен әскерилердің Байзақ ауданындағы №28349 әскери бөлімге баратын жолды жауып, ешкім өткізбей тұрғанын хабарлады.
Жарылыс болған әскери бөлім аумағынан әлі де түтін көрінеді, әскери бөлімге жақын маңдағы кафе мен жанар-жағармайдың бір бөлігі бүлінген.
Жарылыс болған әскери бөлім маңындағы жолдар жабылған
- Авторы: Манас ҚАЙЫРТАЙҰЛЫ
Қорғаныс министрі Нұрлан Ермекбаев: Қызметтен кетуге өтініш беремін
Жамбыл облысындағы төтенше оқиғадан кейін Қазақстан қорғаныс министрі Нұрлан Ермекбаев отставкаға кетуді ұйғарған. Ермекбаев бұл шешімін Азаттыққа жұма күні өткен баспасөз мәслихатынан кейін мәлімдеді. Ол жиында қорғаныс министрі Жамбыл облысы Байзақ ауданындағы әскери бөлімдегі жарылыстан 4 әскери қаза тауып, ондаған адам жараланғанын және бірнеше кісінің хабар-ошарсыз кеткенін хабарлаған еді.
Азаттық: Бұл сіз министр болып тұрған кездегі екінші жарылыс қой. Осы оқиғадан кейін әлеуметтік желіде сіз жайлы "отставкаға кетсін" деген талаптар айтылып жатыр. Оған не деп жауап бересіз?
Нұрлан Ермекбаев: Менің қазіргі басты мақсатым - тез арада апат салдарын жою. Ал отставка мәселесі туралы айтар болсақ, мен осы [жарылыс болғаны туралы] хабарды естігеннен кейін бірінші минутта отставкаға кетуді сұрап өтініш беремін деген шешім қабылдадым. Ал қалғанын жоғарғы басшылық шешеді.
Азаттық: Демек осы мәселе шешілгеннен кейін отставкаға кететініңіз анық па?
Нұрлан Ермекбаев: Мен [өзімді отставкаға жіберуді] сұраймын. Ал қалай болады, оны жоғарғы басшылық біледі.
Нұрлан Ермекбаевтың сөзінше, әскери қоймада жарылған оқ-дәрілер осыдан екі жыл бұрын Арыс қаласынан әкелінген.
2019 жылы 24 маусымда Түркістан облысы Арыс қаласындағы әскери оқ-дәрі қоймасы жарылып, төрт адам қаза тапқан еді. Жарылыс болған күні мыңдағын үй зақымданып, Арыстың 40 мыңнан астам тұрғыны Шымкент қаласы мен төңірегіндегі елдімекендерге эвакуацияланған.
Биыл 26 шілдеде Шымкент қаласындағы әскери бөлімде Түркістан облысы Арыс қаласындағы әскери қоймадағы жарылысқа қатысты айыпталған 16 адамға үкім шыққан еді.
Қазақстан президенті Қасым-Жомарт Тоқаев Арыстағы жарылысқа байланысты Қорғаныс министрі Нұрлан Ермекбаевқа қатаң сөгіс жариялап, әскери қоймадағы оқ-дәрілерді елдімекендер төңірегінен алып кету жөнінде тапсырма берген.
ПІКІРЛЕР