Алматы мен Ташкент арасына қатынайтын жүрдек пойыз шығару туралы Қазақстан мен Өзбекстан үкіметтері арасында келісім жасалып, оның жай-жапсары Өзбекстан президентінің Қазақстанға сапары алдында Ташкентте «Қазақстан темір жолы» компаниясы мен «Узбекистон темир йуллари» компаниясы өкілдерінің кездесуінде нақтыланған. Келісім бойынша тараптар мүмкіндігі шектеулі жолаушылар мен оларды алып жүретін жолаушыларға орын бағасының 70 пайызы көлемінде жеңілдік жасайтыны хабарланған. Қазақстан 21 наурызда Алматы-Ташкент-Алматы халықаралық жүрдек пойызын Өзбекстанға салтанатты түрде шығарып салған. Пойыз 22 наурызда Ташкентке жеткенімен, тек 27 наурызда, арада бір апта уақыт өткенде барып Алматыға қайтып оралды. Бұл туралы «Қазақстан темір жолы» компаниясының Ташкентте орналасқан Орталық Азия аймағындағы өкілдігінің басшысы Нұрлан Кенжебеков Азаттық сұрақтарына жауап берді.
Азаттық: - Алғашқы лектегі жолаушылар арасында қазақстандар көп пе, әлде өзбекстандықтардың салмағы басым ба? Басқа тағы да қандай елдердің азаматтары байқалды?
Нұрлан Кенжебеков: - Алғашқы лектегі жолаушылар арасында қазақстандықтарға қарағанда өзбекстандықтар көбірек кездеседі. Әзірге басқа елдердің азаматтары байқалмайды.
Азаттық: - Алматы-Ташкент-Алматы бағытындағы пойыздың іске қосылғанын өзбекстандықтар қалай қабылдап жатыр? Ерекше деп айтатындай нені байқадыңыз?
Нұрлан Кенжебеков: - Бұл пойыздың іске қосылғанын екі ел халқы да, шынын айту керек, оң қабылдап жатыр. Біз, екі мемлекет теміржол әкімшіліктері бұл пойызды төрт жыл бұрын жібергіміз келген. Бірақ кейбір себептерге байланысты іс созылып кетті. Міне, енді жақында ғана өткен Қазақстан - Өзбекстан үкіметаралық отырысынан соң тапсырма беріліп, Наурыз мерекесіне дейін Алматы-Ташкент теміржол қатынасын іске қостық.
Алматы-Ташкент халықаралық жүрдек пойызы жайлы видео:
Азаттық: - Бұл пойыздың 29 вагоннан тұратыны, 400 жолаушыға арналғаны хабарланған. Алғашқы аптада қатынаған пойыз жолаушыға толды ма? Билеттің сатылымы қалай болып жатыр?
Нұрлан Кенжебеков: - Алғашқы аптада қатынаған пойыздың жолаушылары 90 адамнан асты. Бұл бірінші күнгі ғана жайт екенін ескерткім келеді. Ал қазіргі жағдайда 60 пайыз көлемінде билет сатылып жатыр. Халық бір бірінен естіп билет алып жатыр. Пойыз Алматыдан аптасына екі рет: дүйсенбі, сенбі күндері аттанса, Ташкенттен сейсенбі, жексенбі күндері кері қарай жолға шығады. Екі аралықтағы жолды пойыз 16 сағат 30 минутта жүріп өтеді. Алматы-Ташкент-Алматы пойызы жолай Отар, Шу, Тараз, Шымкент, Сарыағаш станцияларына аялдайды. Алматы мен Ташкент арасына қатынаймын деген жолаушы үшін пойыздың бағасы люкс орындар үшін - 13 мың теңге; бизнес орындар үшін - 11 мың теңге; купе орындар үшін - 9 мың 342 теңге және отыратын орындары - 4 мың 228 теңге тұрады.
Азаттық: - Екі ел шекарасында жолаушылардың паспортын тексеру екі сағаттай уақыт алады. Алдағы уақытта оны жеделдету мүмкіндігі бар ма, әлде бұл қалыпты жағдай ма?
Нұрлан Кенжебеков: - Екі ел шекарасында жолаушылар паспортын тексеру бір жарым сағаттай уақыт алады. Өзбекстан мемлекетінде қауіпсіздік мәселесі бірінші орынға қойылған. Сол себепті бұл - қалыпты жағдай. Алдағы уақытта оны жеделдету мүмкіндігі бар.
Азаттық: - Пойыз қалай жабдықталған? Қызмет көрсету үлгісі қандай? Өзге халықаралық теміржол бағытымен салыстырғанда ерекшеліктер бар ма?
Нұрлан Кенжебеков: - Алматы-Ташкент-Алматы пойызына соңғы үлгіде Қазақстанда жасалған, «Тұлпар-Тальго» зауытынан шыққан кең шанақты вагондар пайдаланылып отыр. Қызмет көрсету үлгісі де жоғарғы деңгейде. Тиісінше, мұндай вагондарда мүмкіндігі шектеулі жандардың да мәселесі де ескерілген. Бұл осы аймақтағы жолаушыларға жайлы болады деген үмітіміз бар. Өзге халықаралық теміржол бағытымен салыстырғандағы ерекшелігі – Қазақстанда жасалған алғашқы вагондар Алматы-Ташкент пойызында халықаралық бағытта бірінші рет жолға шығып отыр.
Азаттық: - Қазақстан мен Өзбекстанның темір жол саласындағы ынтымақтастығы тек жолаушылар тасымалымен өлшенбесе керек. Екі елдің аталған саласы бойынша байланысты қалай бағалар едіңіз?
Нұрлан Кенжебеков: - Қазақстан мен Өзбекстанның арасындағы теміржол саласындағы ынтымақтастық жоғарғы деңгейде десек болады. Қазіргі кезде екі ел арасындағы жүк тасымалы да жақсы дамыған. «Сарыағаш» және «Оазис» мемлекеттік өткізу бекеттері арқылы транзиттік және импорттық жүктер тасымалданып келеді. Қазақстандағы Ақтөбе рельс шығару зауыты да өнімдерін Өзбекстанға экспортқа шығарып отыр.
Азаттық: - «Қазақстан темір жолы» жаңа халықаралық Алматы-Ташкент бағытындағы теміржол қатынасын іске қосу арқылы неден ұтып отыр деп ойлайсыз?
Нұрлан Кенжебеков: - «Қазақстан темір жолының» жолаушылар тасымалы қатынасынан не нәрсе ұтып отыр деп айтуға болмайды, бұл - халыққа көрсетіліп отырған қызмет. Компанияның халықаралық деңгейдегі беделін көрсетіп, өзімізде құрастырылып жатқан вагондармен басқа мемлекетке жолаушылар тасымалдап отырмыз.
Азаттық: - Орталық Азияның өзге де елдерімен темір жол арқылы жолаушылар тасымалы қарастырылып жатқаны белгілі. Алдағы уақытта тағы да қандай елдерге теміржол арқылы қатынауға болады?
Нұрлан Кенжебеков: - Қазір Қазақстаннан Түркіменстан арқылы Иранға қатынайтын темір жол желісі арқылы жолаушылар тасымалы қарастырылып жатыр. Бұл туралы алдағы уақытта кеңірек хабарлана жатар деп ойлаймын.
Азаттық: - Сұхбат бергеніңізге рахмет.
