22 ақпан күні бас санитар мен денсаулық вице-министріне "Спутник" екпесінің екінші дозасы салынады
22 ақпан күні Қазақстанның бас санитарлық дәрігері Ерлан Қиясов пен денсаулық сақтау вице-министрі Ажар Ғиният Нұр-Сұлтан қаласындағы №6 қалалық емханада ресейлік "Спутник V" вакцинасының екінші дозасын салдырады. Бұл туралы Денсаулық сақтау министрлігінің баспасөз қызметі хабарлады.
Бұқаралық ақпарат құралдарына іс-шарадан хабарадан таратуға шектеу қойылады. Тек Хабар24 арнасына ғана рұқсат беріледі. Арна сағат 9:00 уақытында тікелей эфирге шығады.
Коронавирусқа қарсы вакцинаның алғашқы дозасын Қиясов пен Ғиният 1 ақпан күні салдырған. Сол күні Қазақстанда коронавирусқа қарсы вакциналау басталған.
Денсаулық сақтау министрлігі жыл аяғына дейін 6 миллион адамға екпе салуды жоспарлап отыр. Бірінші кезекте аурухана қызметкерлері, екінші кезекте жалпы білім беретін мектептер мен жоғары оқу орындары, медицина мекемелері қамтылады. Оларға екпе наурыз айынан салына бастайды. Сәуір айынан мектеп-интернат, мектепке дейінгі білім беру ұйымдары, созылмалы ауруы бар студенттердің кезегі басталады.
- 2 ақпан күні беделді медициналық журнал The Lancet "Спутник" сынағының қорытындысын жариялап, вакцинаның тиімділігі 92 пайыз деді.
- Үкімет "Спутник V" вакцинасын Қазақстанда өндіру үшін Қарағанды фармацевтика кешеніне 15 миллиард 175 теңге бөлді. Денсаулық сақтау министрі бастапқыда вакцинаның екі дозасын 26 долларға сатып алатынын, өндіріс ұлғайғанда баға төмендеуі мүмкін екенін айтты.
- 15 ақпан күні Қазақстан "Спутник V" екпесінің Қарағандыда өндірілетін нұсқасын мақұлдады.
- Қарағанды фармацевтика кешені иелерінің бірі – Қазақстанның бұрынғы президенті Нұрсұлтан Назарбаевтың құдасы Қайрат Боранбаев.
- Қазақстан отандық вакцинасын да әзірлеп жатыр. Желтоқсанда Qazcovid-IN вакцинасы сынақтың үшінші кезеңінен өте басталғаны мәлімделген.
- Желтоқсан айында Қазақстанда отандық Qazcovid-IN вакцинасы сынақтың үшінші кезеңінен өте бастағаны хабарланды. Денсаулық сақтау министрлігі вакцина тиімділігі 96 пайызға жетті деп мәлімдеген. 10 ақпанда денсаулық сақтау вице-министрі Ажар Ғинаят оған 31 млрд теңге жұмсалады, 15,6 млн адамға екпе салынады деп айтқан.
Қазақстанда коронавируспен 804 науқас, 6 өлім тіркелді
21 ақпан күні Қазақстан денсаулық сақтау министрлігі коронавируспен тағы 804 науқас, 6 өлім тіркелгенін хабарлады. Жаңа тіркелген 38 науқасқа ауру белгілері бойынша коронавирус пневмониясы қойылған, олардың вирус жұқтырғаны ПТР тестімен расталмаған. Алты өлімнің екеуі осы санаттағы науқастар қатарынан.
Қазақстан былтыр тамыздан бері коронавирус науқастарының екі статистикасын жүргізіп келеді. Бірі – вирус жұққаны ПТР тестімен расталған науқастар дерегі, бірі – ПТР тестімен расталмаған (КВИ+), диагнозы ауру белгілері бойынша қойылған коронавирус пневмониясы дерегі (КВИ-). Кейінгі күндері белгілі болғандай, КВИ+ дерегі бір күннен кейін, КВИ- дерегі екі күннен кейін жарияланады.
Жаңа тіркелген 804 науқастың 766-сы КВИ+ санатына жатқызылған және олардың дерегі 20 ақпан күні нақтыланған. КВИ- санатындағы 38 науқастың дерегі одан бір күн бұрын, яғни 19 ақпан күні анықталған.
Күнделік жарияланып келген коронавирус пневмониясы дерегінің кешегі күндікі емес, алдыңғы күндікі екені ақпанның басында белгілі болды. Денсаулық сақтау министрлігі күн сайын таңертең коронавирус дерегі бойынша инфографика жариялайды. Онда КВИ+ және КВИ- деректері қатар көрсетіледі. Екеуі бірдей күннің ақпараты деп жазылды.
2 ақпан күні Денсаулық сақтау министрлігі КВИ- санатындағы науқастардың аймақтық дерегін жариялай бастап, деректің 31 қаңтар күнге тиесілі екені көрсетілді.
КВИ+ санаты бойынша барлығы 207 418 науқас тіркелген. Оның 2694-і қайтыс болған. Бұл статистикаға коронавирус жұқтырғаны расталған, бірақ "ілеспе аурудан қайтыс болды" деген жүздеген адам кірмей қалған. 191 097 адам жазылып шыққан, 13 627 адам емделіп жатыр.
КВИ- санаты бойынша тіркелген науқастар саны 48 970-ке жетті. Оның 610-ы қайтыс болған. 40 570 адам жазылып шыққан, 7790 адам емделіп келеді.
Денсаулық сақтау министрлігінің хабарлауынша, 237 науқастың жағдайы ауыр, 54 науқастың жағдайы өте ауыр, 45 науқас өкпені желдету аппаратына қосылған.
Қазақстанда коронавирустан тағы 10 адам көз жұмды
Қазақстанда коронавирус салдарынан тағы 10 адам қайтыс болған. Оның жетеуі Covid-19 вирусын жұқтырғаны (КВИ+) анықталған, ал үшеуіне ПТР тестімен расталмаған (КВИ-) коронавирус пневмониясы диагнозы қойылған. Бұл туралы 10 ақпан күні денсаулық сақтау министрлігі хабарлады.
20 ақпандағы эпидемия ахуалын бағалау матрицасына сәйкес, елде "қызыл" (қауіпті) аймақта тұрған өңір жоқ. "Сары" аймақта Ақмола, Батыс Қазақстан, Қостанай және Солтүстік Қазақстан облыстары бар. Қалғаны – "жасыл" аймақта.
Ресми ақпаратта бір күнде коронавируспен 872 науқас тіркелгені, оның 45-іне ПТР тестімен расталмаған коронавирус пневмониясы диагнозы қойылғаны айтылған.
Қазақстан коронавирус науқастарының статистикасын екі бөлек жүргізіп келеді. Қазіргі мәлімет бойынша, елде 21340 науқас емделіп жатыр (13352 –КВИ+, 7988 – КВИ-).
Қазақстанда Covid-19 індеті келгелі вирус жұқтырғаны ПТР тестімен расталған науқастар арасында қайтыс болғандар саны 2690 адамға жетіп отыр. Билік бұл статистикаға Covid-19 инфекциясын жұқтырғаны расталған, бірақ "ілеспе аурудан қайтыс болды" деген жүздеген адамды кіргізбеген.
Елде барлығы 206 652 адамның Covid жұқтырғаны расталған. Ал ресми статистикасы былтыр тамыздан бері жүргізіліп келе жатқан КВИ- жұқтырғандар саны 48 932 адамға жетті, оның 608-і қайтыс болған.
Жергілікті сарапшылар Қазақстанда коронавирус статистикасы азайтылып көрсетіледі дейді. Былтыр маусым, шілде айларында ПТР тесті теріс нәтиже көрсеткен, бірақ ауру белгілері коронавирусқа ұқсайтын пневмонияға шалдыққандар күрт көбейген.
961 науқас, 10 өлім. Қазақстандағы Covid індетінің ахуалы қандай?
18 ақпан күні Қазақстан денсаулық сақтау министрлігі коронавируспен 930 науқас (869 КВИ+ және 61 КВИ-), 10 өлім тіркелгенін хабарлады. Нұр-Сұлтан, Алматы қалаларында және Павлодар облысында тіркелген науқастар саны жүзден асады.
Қазақстан билігі коронавирус науқастарын екі бөлек санайды. Бірі – вирус жұқтырғаны ПТР тестімен расталған науқастар (КВИ+), бірі – ПТР тестімен расталмаған, бірақ ауру белгілері бойынша коронавирусқа ұқсайтын пневмония науқастары (КВИ-). КВИ+ деректері келесі күні, КВИ- деректері екі күннен кейін жарияланып келеді.
Яғни, тіркелгені бүгін жарияланған 930 науқастың 869-ы кеше анықталған және олардың бәрінде ПТР тест оң нәтиже берген. Ал коронавирус пневмониясына шалдыққан 61 науқас 16 ақпан күні тіркелген.
КВИ+ науқастары арасында аймақ бойынша жағдай мынадай:
Нұр-Сұлтан қаласында – 24088 (+105 жаңа тіркелген науқас),
Алматы қаласында – 23941 (+105),
Шығыс Қазақстан облысында – 21392 (+71),
Атырау облысында – 16809 (+35),
Павлодар облысында – 16625 (+114),
Қарағанды облысында – 14903 (+65),
Ақмола облысында – 12860 (+72),
Батыс Қазақстан облысында – 12329 (+84),
Солтүстік Қазақстан облысында – 11954 (+32),
Қостанай облысында – 11645 (+69),
Алматы облысында – 10277 (+61),
Шымкент қаласында – 6030 (+8),
Жамбыл облысында – 5793 (+11),
Түркістан облысында – 4231 (+8),
Маңғыстау облысында – 4174 (+4),
Ақтөбе облысында – 4131 (+19),
Қызылорда облысында – 3742 (+6).
Қазақстанға індет келгелі барлығы 204 924 науқастың ПТР тесті оң шыққан. Ресми статистика бойынша, оның 2674-і коронавирустан қайтыс болған саналады. Бірақ бұдан бөлек, Covid инфекциясын жұқтырғаны расталған, бірақ "өзге себептен қайтыс болды" деген жүздеген адам бар.
Вирус жұқтырғаны расталған бұл науқастардың 188 606-сы жазылып шыққан. Қазір 13 644-і емделіп жатыр.
Қазақстан үкіметі есебін 1 тамыздан бастап жүргізіп келе жатқан коронавирус пневмониясымен барлығы 48 827 адам тіркелген. Оның 29 873-і жазылған, 604-і қайтыс болған. 8350 науқас емделіп жатыр.
Коронавирустан емделіп жатқан 21 944 науқастың 4900-ы стационарлық, 17094-і амбулаториялық бақылауда.
ПІКІРЛЕР