12 ақпанда Ақтөбедегі "Жолаушылар автокөлік кәсіпорнының" жүзге тарта жүргізушісі жұмысқа шығудан бас тартты. Қала іші мен маңындағы ауылдарға жолаушы тасымалдайтын кәсіпорын жүргізушілері жалақыны 200 мың теңгеге дейін өсіріп, еңбек жағдайын жақсартуды талап етті. Ақтөбе қаласының әкімі Асхат Шахаров "күні бойы осында боламын, әкімдікке бармаймын, мәселемен танысып, шешемін" деп сөз бергеннен кейін ғана жүргізушілер ереуілді тоқтатуға көнді. Жұма күні таңертең Ақтөбенің іші мен қала маңына автобус жүрмей, мыңдаған адам жолынан қалды.