Қаңтар дүрбелеңі кезінде бейбіт адамдар күш құрылымдарының оғынан қаза тапты дейтін куәгер көп. Алайда ішкі істер министрлігі соның бірнешеуін ғана мойындап отыр. Министрлік Талдықорғанда 7 қаңтарда Қайрат Нұрғалиев пен Андрей Карпиленконы әскерилер атып тастағанын мойындаған. Олардың әрекеті қылмыстық кодекстегі "билігін асыра пайдалану" бабына сайкес келеді. 8 қаңтарда 15 жасар баласымен көлікте кетіп бара жатып оққа ұшқан ерлі-зайыпты Нұрболат Сейітқұлов пен Алтынай Етаеваның туыстары да министрліктен осындай хат алған. 3 мамырда қорғаныс министрлігі бұл екі жағдай бойынша әскерилердің жауапқа тартылмағанын айтты.