Теңіздің тамшысындай Кіші Арал

Соңғы жарты ғасырдан астам ұдайы құрғап келген Арал теңізінің солтүстік бөлігі біртіндеп қалпына келе бастады. Арал қаласынан 70 километрдей қашықтап кеткен теңіз қазір қалаға 20 километрге жуық жақындаған. Солтүстік жағасы - Қазақстанмен, оңтүстігі Өзбекстанмен шектесетін Арал теңізі өткен ғасырда өзінің бастапқы көлемінен төрте есеге дерлік тартылды. Бұдан 75 жыл бұрын Арал әлемдегі төртінші ірі тұзды көл болатын. Қазір Арал тартылып, судың 10 пайыздайы ғана қалған. Сарқылудың бір себебі – Арал теңізіне құятын өзен суының шектен тыс пайдаланылуы. Көлдің орнында сілтілі топырақ пен тұз аралас бетпақ дала қалды. ​Теңіздің тартылғаны жайлы ақпарат совет кезеңінің соңғы жылдары ғана пайда болды. 1990 жылдардан бастап Арал өңірі «экологиялық апат аймағы» болып жарияланды. 2005 жылы Көкарал бөгеті салынғаннан кейін Аралдың Қазақстан жағындағы шағын бөлігіне қайтадан су тола бастады. Бөгетте балықтардың кері қайту жолы қарастырылмағандықтан, қазір бөгетті көтеру қажеттігі туындаған. Арал теңізінің Қазақстан жақ бөлігі қазір "Кіші Арал" деп аталады. Алайда теңіздің құрғаған бөлігінен ауық-ауық тұзды дауыл көтеріліп, төңірекке тарап жатыр. Мәселен, биылғы көктемде теңіздің орнынан бораған шаң мен тұз Түркіменстанның солтүстігі мен шығысын, Өзбекстанның Бұхара, Хорезм, Науаи аймақтарын және Қарақалпақстан автономиялық республикасын басып қалды.​
Теңіз жағалауындағы Орталық Азия мемлекеттері Арал теңізін құтқаруда жұмыла әрекет етеміз деп уәде берумен келеді.
Азаттық тілшісі таяуда Қызылорда облысы Арал ауданына сапарлап, Кіші Аралдағы жағдаймен танысып қайтты.