"Қазір ешқандай келісім жасалған жоқ, бірақ тараптар алдағы уақытта мәселені талқылауға әзір" деп хабарлады Ақ үй баспасөз хатшысы Сара Сандерс ақпанның 28-і күні түстен кейін. Сандерстің сипаттауынша, Трамп пен Ким арасындағы кездесу "өте жақсы әрі конструктивті" өткен.
Екі ел басшылары саммит өткен қонақ үйден жеке көліктерімен жоспарланған уақыттан ертерек кеткен. Ал жоспарланған ортақ келісімге қол қою рәсімі болмайды деп хабарланды.
Кейінірек баспасөз мәслихатында Трамп Солтүстік Кореяға қарсы экономикалық санкциялардың күшін толық жоюға дайын емес болғанын атап өткен.
"Жалпы айтқанда олар санкцияның толық күші жойылғанын қалайды. Алайда біз мұны жасай алмаймыз. Сондықтан келіссөзден кетуге мәжбүр болдық" деді Дональд Трамп.
Саммиттің екінші күні түске дейін АҚШ президент Дональд Трамп ядролық қарусыздандыру мәселесі бойынша келісімге қол жеткізуде асығыстық жасамайтынын жеткізген еді.
“Әу бастан-ақ маған жылдамдық маңызды емес деп айтқанмын. [Солтүстік Кореяның] Ядролық қару мен зымырандарды сынақтан өткізбеуін жоғары бағалаймын” деп айтқан.
Трамппен кездесу барысында Ким алғаш рет шетел журналисінің сұрағына жауап берген. "Келісімнің болатынына сенімдісіз бе?" деген Washington Post тілшісінің сұрағына Солтүстік Корея басшысы:
"Бір нәрсе айтуға әлі ертерек, бірақ пессимистпін деп айта алмаймын. Жақсы нәтижеге қол жеткіземіз деген ойдамын. Біз көп күш салдық, нәтижесін көрсететін мезгіл жетті" деген.
Reuters хабарлауынша, Трамп пен Ким келіссөз барысында өзара ядролық қарусыздану шаралары атап айтқанда, Солтүстік Кореяның Йонбендегі ядролық реактордың жойылуын бақылауға рұқсат беру сияқты мәселені талқылаған. Екі ел басшылары 1950-53 жылғы Корея соғысының аяқталуына байланысты саяси мәлімдеме жасау мүмкіндігін де қарастырған.
Бұған дейін ақпарат құралдары саммит соңынан Трамп пен Кимнің ядролық қарусыздану бойынша келісімге қол қоюды жоспарлап отырғанын, тараптардың оптимистік көзқарас танытып отырғанын жазған. Бірақ қол қою рәсіміне аз уақыт қалғанда рәсімнің болмайтыны айтылды.
"Америка дауысы" сайтының хабарлауынша, Ханойдағы "Метрополь" қонақ үйінде бүгін сессия басталмас бұрын екі ел басшылары жеке сөйлескен. Журналистер Ким Чен Ынның Трампты келіссөз жүргізу үшін алғашқы қадам жасап, "батырлық" танытқаны үшін мақтағанын естіген.
Солтүстік Корея 2017 жылдың соңынан бері құрлықаралық баллистикалық зымырандарына сынақ жасамаған. Трамп бұл жолы да "егер келісім жасалса" Солтүстік Кореяның қуатты елге айналу мүмкіндігі барын қайталаған.
АҚШ-Солтүстік Корея саммиті Вьетнам астанасы Ханойда ақпанның 27-сі күні басталған. Саммиттің бірінші күні екі ел басшылары журналистер алдында қысқа кездесу өткізіп, соңынан кешкі ас ішкен. Келіссөздің негізгі бөлігі 28 ақпанда өткен.
Өткен жылғы Сингапурдағы алғашқы саммитте Трамп пен Ким Корей түбегін ядролық қарудан толық арылту жөнінде бірлескен декларацияға қол қойған. Алайда кейінірек ақпарат құралдары Солтүстік Кореяның ядролық қаруын қайта дамытып жатқанын жазған.
ВИДЕО: Саммиттің алғашқы күні (27 ақпан 2019 жыл).
ПІКІРЛЕР