Байден Ресей мұнайы импортын тоқтату туралы заңға қол қойды
АҚШ президенті Джо Байден Ресейдің Украинадағы соғысына байланысты Мәскеу мен Минскіге қосымша санкция салатын екі заң жобасына қол қойды.
Ақ үй хабарламасына сәйкес, "Ресей мұнайы импортын тоқтату туралы заң" Ресейден энергетика өнімдерін импорттауға тыйым салады. Ал "Ресей және Беларусьпен қалыпты сауда қарым-қатынасын тоқтату туралы заң" сауда және адам құқығы жөніндегі санкцияларды күшейтуге бағытталған.
Екі заң да Ресейдің Украинаға агрессиясымен байланысты. Заң жобаларын жуырда Конгресс мақұлдаған. Ақ үй баспасөз хатшысы Джен Псакидің айтуынша, санкция - бұл "президент қолдап келген және соған үндеген" шара.
Байден әкімшілігі осы аптада Ресейдің ірі қаржы институттары мен бірқатар тұлғаларына санкция жариялаған.
Еуроодақ та Ресейге кезекті санкциялар пакетін жариялады. Оған сәйкес, өзге өнімдерден бөлек, Ресейден көмір импорттауға, сонымен қатар Ресей мен Беларусь жүк тасымалдаушыларына Еуроодаққа кіруіне тыйым салынды. Санкция тізіміне Владимир Путиннің қыздары Катерина Тихонова мен Мария Воронцова да енген.
Алматыда Ресей консулдығы алдында Буча қырғыны құрбандарын еске алған белсенділер ұсталды
Алматыда Ресей консулдығы алдында Буча қырғыны құрбандарын еске алу акциясына қатысқан Oyan, Qazaqstan белсенділерін полиция ұстап әкетті. Бұл жөнінде аталған қозғалыс Телеграм парақшасында хабарлады.
Ақпаратқа қарағанда, белсенділер қолдары байлаулы күйі консулдық алдында жерде жатқан. Осылайша Украинаның Буча қаласындағы қанды қырғын құрбандарын бейнелеуге тырысқан.
Ұсталған белсенділер арасында Әсем Жәпішева, Тамиля Анчуткина, Дархан Шәріпов, Ақбота Шәріпжанова бар.
Оларды Бостандық аудандық полиция басқармасына алып кеткен. Әзірге полиция түсініктеме бермеді.
Киев түбіндегі Буча қаласы сәуірдің басында Ресей әскерінен азат болып, қалада ондаған бейбіт азаматтың өлтірілгені мәлім болды. Мәйіттер арасында қолы артқа қайырыла байланғандар да болды. Қалада бауырластар зираты да пайда болған. Украина билігі 300-ден астам бейбіт тұрғынның опат болғанын айтады. Әлемдік қауымдастық бұл қылмысты жасаған Ресей әскері деп отыр.
Ресей Бучадағы бейбіт азаматтарды өлтірді деген айыпты жоққа шығарып, мұны "Украинаның арандатуы" деп атаған.
Еурокомиссия басшысы Киевке: Бұл біздің ортақ күресіміз
Еурокомиссия басшысы Урсула фон дер Ляйен Еуроодақ Украинаны әрі қарай да қолдай береді және Ресей президенті Владимир Путинді әскери басқыншылығы үшін "жоғары құн" төлеуге мәжбүрлейді деді.
Осы апта соңында Украинаға сапарлаған Урсула фон дер Ляйен сапарын ондаған бейбіт тұрғын қырылған Буча қаласынан бастады. Ол қанды қырғын орнына барған Еуроодақтың алғашқы жоғары лауазымды тұлғасы. Өткен аптаның соңында Ресей әскері кеткеннен кейін Буча қаласынан ондаған адамның мәйіті табылып, халықаралық қауымдастық әскери қылмысты қатаң айыптаған.
Қаланы аралап, бауырластар зиратына барған фон дер Ляйен құрбандарды еске алып, шіркеуде майшам жақты.
Фон дер Ляйен сапарын Бучадан бастау өте маңызды екенін, себебі мұнда адамдыққа нұқсан келгенінін атап өтті. Ол кінәлілер қылмысы үшін жауапқа тартылады деді. "Бұл біздің ортақ күресіміз" деді Еурокомиссия жетекшісі.
Бұдан соң ол Украина президенті Владимир Зеленскиймен брифинг өткізіп, Киевтің Еуроодаққа қосылу туралы өтінішін тезірек қарауға уәде берді. Ол Зеленскийге одаққа ену процесін бастау бойынша сұрақтар жинағын тапсырды.
Германия президенті Путин мен Лавровты сотқа тарту қажеттігін айтты
Германия президенті Франк-Вальтер Штайнмайер Украинадағы әскери қылмысқа жауапты тұлғалардың бәрін, оның ішінде Ресей басшылығын да жауапқа тарту қажеттігін мәлімдеді.
Der Spiegel журналына берген сұхбатында Штайнмайер Ресей басшысы президент Владимир Путин мен сыртқы істер министрі Сергей Лавров Гаагадағы Халықаралық сот алдында жауап беруі тиіс деді. Оның пікірінше, Украинада қылмыс жасаған барлық әскери қызметкер, оларға бұйрық бергендер мен саяси шешімдерге жауапты (арасында Путин мен Лавров та бар - Ф.В.Ш) тұлғалар жазаға тартылуы тиіс. Штайнмайер Буча қырғынын еске алып, ол жақтан түсірілген жан түршігерлік кадрларға "қараудың өзі мүмкін емес" екенін айтты.
Гаагадағы қылмыстық істер жөніндегі Халықаралық сот Украинаның пікірінше, Ресей әскері жасады деген әскери қылмыстарды тергеп те жатыр. Алайда Ресей сотпен әріптестік танытуға ықылас білдірмеген. Путиннің баспасөз хатшысы Дмитрий Песков британдық Sky News арнасына берген сұхбатында Путинді халықаралық трибуналға тартуға негіз жоқ екенін айтқан.
Deutsche Welle басылымының жазуынша, кейінгі күндері неміс қоғамында сынға ілінген бұрынғы сыртқы істер министрі, қазіргі Германия президенті бұған дейінгі Ресеймен қарым-қатынасындағы қателіктерін мойындаған. Ол "Солтүстік ағыс - 2" жобасын қолдағаны үшін немесе Донбасс мәселесінде мәмілешіл ұстанымы үшін сынға ұшыраған.
Осыған дейін де Путинді Украинадағы соғысқа байланысты сотқа тарту туралы бірнеше рет бастама көтерілген және оны өте көп адам қолдаған.
Ресей билігі орыс әскері Украинада қылмыс жасап жатыр деген тұжырыммен келіспейді және ондай мазмұндағы хабарламаларды фейк деп атайды немесе жауапкершілікті Украинаға жүктейді.
ПІКІРЛЕР