Ресейде жұмысқа орналасу үшін Ресей тарихы мен қоғамтанудан тест тапсыратын шетелдік мигранттар емтиханда қойылатын сұрақтардың шет жағасын білді.
Күнделікті шығатын ресейлік «Известия» басылымы осы емтиханда келетін бес нұсқаның біреуін жариялады.
Аула сыпырушы немесе кірпіш қалаушы сияқты қара жұмыс іздеп келетін мигранттарға 2015 жылдан бастап Ресей тарихын оқып, атаулы оқиғаларды білу міндетті. Олар 1000 жылдық Ресей тарихындағы Киев Русі, моңғол шапқыншылығы, патшалар билігі, Совет Одағына қатысты 20 сұраққа жауап беретін болады.
Кремльге тәуелді басылымда жарияланған тест үлгісіне қарағанда, көбінесе Орталық Азия мен Оңтүстік Кавказдан келетін мигранттар Үлкен театрды суретінен танып, Ресейдің соңғы патшасының атын тауып, Совет Одағында азаматтардың қандай тегін қызмет түрлерін пайдаланғанын білуге тиіс.
Ұсталған еңбек мигранттары полиция көлігінде отыр. Красноярск, 7 тамыз 2013 жыл.
Төртінші Иван патша халық арасында қандай атаумен кеңінен танылды деген тағы бір сауалдың: «Жұмсақ Иван», «Қаһарлы Иван», «Азат етуші Иван» деген жауап нұсқалары ұсынылады. «Известия» бетінде жарияланған мақалада автордың төртінші Иванды «Иван VI» (сәби кезінде тақтан тайдырылған патша) деп қателесіп жазғанына қарап, емтихан тапсырған күнде оның да барлығына дұрыс жауап беруі екіталай деген ой келеді.
Мигранттардың орыс тарихына қатысты білімін тексеретін сұрақтардың ішінде «Куликов шайқасы қайда өтті?», «18-ғасырда қай патшаның тұсында Қырым Ресейге қосылды?» деген сұрақтар бар.
«ЖЕМҚОРЛЫҚҚА ЖОЛ АШАТЫН ШАРА»
Мигранттар қыркүйектің 1-інен бастап сынақ тапсыра беруге мүмкіндік алады. 2015 жылы қаңтардың 1-інен бастап олар Ресейде жұмысқа тұруға рұқсат беретін куәлігін көрсетуге тиіс.
Басқа мигрант тесттеріне арналған жалған куәліктерді сол жерде алу оңайға түсетін сияқты. Ресми куәліктің құны әдетте 90 АҚШ доллары шамасында. Бұл тесттің мигранттардың білім деңгейін қаншалықты анықтайтыны түсініксіз, тіпті осының өзі сынақ па деген сауал туындайды.
Мультфильм кейіпкерінің киімін киген еңбек мигранты Мәскеудегі метро станциясының жанында отыр.
«Известия» жариялаған емтихан үлгісіне қарап, мигранттардың сынақ кезінде тарихи терминдер сөздігін қолдана алатынын аңғаруға болады. Сұрақтарды дайындауға қатысқан Ресей халықтар достығы университеті қыркүйек айының басында барлық сұрақтар мен жауаптары сайтта жарияланатынын хабарлады. Дұрыс жауапты белгілеу үшін мигранттарға 35 минут уақыт беріледі.
Тарихқа қатысты сұрақтардан бөлек, мигранттар сол жерде орыс тілінен де сынақ тапсырады, оның үлгісі 2012 жылы қараша айында таныстырылған еді. Бұл екі шара да Ресейде мигранттарға қарсы толқулар басталып, қоғамда ұлтшылдық көңіл-күй күшейген соң қабылданған.
Тілге қатысты емтихан кезінде оқуға 15 минут, сөйлесуге 10 минут беріледі, грамматикадан бірнеше нұсқа бар. Сондай-ақ жұмысқа тұру өтінішін толтыру сияқты қарапайым үлгілер беріледі.
Бұл сынақты заң бойынша жоғары білікті мамандар, студенттер мен ресми тіркелген жоғары оқу орындарының түлектері тапсырмайды. Сынаушылар бұндай емтихандарды «қағазбастылықты көбейтіп, сыбайлас жемқорлыққа жол ашатын әрекет» деп сипаттайды.
Азаттық тілшісі Том Бэлмфордтың мақаласын ағылшын тілінен аударған – Динара Әлімжан.