Венгрия бір түнде 215 азаматын Израильден алып кетті
Венгрияның сыртқы экономикалық қатынастар және сыртқы істер министрі Петер Сийярто Израильден 215 венгр азаматы көшірілгенін мәлімдеді. Министр бұл жөнінде 9 қазанда қазанда таңертең Facebook-парақшасына жазды. Ақпаратқа қарағанда, Венгрия азаматтары Израильден мінген екі ұшақ ел астанасы Будапештке қонған.
Қазақстан СІМ: Израильде қаза тапқан, жараланған я кепілге алынғандар арасында қазақстандықтар жоқ
Қазақстан сыртқы істер министрлігі Айбек Смадияров 9 қазанда Астанадағы брифингте ХАМАС тобының шабуылына ұшыраған Израильдегі Қазақстан азаматтары жайлы ақпарат берді.
Оның сөзінше, Израильде Қазақстанның консулдық есебіне тұрмаған 400-ден астам қазақстандық бар, бірақ оларды іздеп табу қиындық туғызып отыр.
Кейінгі екі күнде қазақстандық дипломаттар "жедел желі" бойынша түскен 500-ден астам қоңырауды сұрыптаған. Арнайы ашылған чаттта қазір Израильде жүрген 200-ден астам Қазақстан азаматы тіркелген.
118 қазақстандық елге оралуды ұйғарған, қазір оларды алып кетуге арнайы рейс дайындалып жатыр деп хабарлады СІМ өкілі.
"Осы сәтке келіп түскен мәліметтерде Израильде қаза тапқан, жараланған я кепілге алынғандар арасында қазақстандықтар бар деген ақпарат болған жоқ", – деді Смадияров дүйсенбі күнгі брифингте.
Бұдан бір күн бұрын Қазақстан СІМ "көптеген бейбіт тұрғынның қаза табуына әкеп соққан Палестина-Израиль қақтығысының өршуіне терең алаңдаушылық білдіреді" деп мәлімдеген. Қазақстан дипломаттары жанжалға қатысушы тараптарды "қалыптасқан жағдайды бейбіт жолмен шешу үшін саяси құралдар іздестіруге" үндеген.
Қазақстан СІМ: Газа секторында кемінде 25 азаматымыз бар
Қазақстан сыртқы істер министрлігінің дерегі бойынша, Газа секторында кемінде 25 қазақстандық бар. Бұл туралы бүгін Астанадағы брифингте министрліктің ресми өкілі Айбек Смадияров хабарлады.
"Негізінен олар палестиндіктерге күйеуге шыққан біздің азаматтарымыз" деді. Смадияров. Оның сөзінше, Газа секторындағы қазіргі жағдайға байланысты неғұрлым толымды ақпарат алуға мүмкін болмай отыр.
"Келіп түскен кейбір хабарларға қарағанда, Израильдің құрлықта операция жасау жоспарына және әуеден бастырмалата соққы беретініне байланысты қауіпсіз орын іздеп, Газа секторын тынымсыз кезіп жүрген бірнеше отбасы бар" деген Смадияровтың сөзін келтірген Orda telegram-каналы.
Al Jazeera телеарнасы Палестинаның денсаулық сақтау органдарының өкілдерінің сөзіне сүйеніп, Израильдің Газа секторындағы әскери іс-қимылынан қаза тапқандар саны 493 адамға жеткенін хабарлады. 2750 адам жараланған деп хабарлады ВВС.
Палестиналық ХАМАС радикал тобы (АҚШ пен Еуропа одағы террорлық ұйымдар тізіміне енгізген) 7 қазанда Израильге әуелі әуеден көп зымыранмен шабуыл жасағаннан кейін Газа секторындағы бекініс шебін бұзып өтіп, жақын аудандарға тұтқиылдан басып кірген. Қарулы радикалдар кей тұстарда ондаған километрге дейін дендеп еніп, бейбіт тұрғындарды жаппай қырып-жойған, біршама адамды кепілге алып кеткен.
8 қазан кешке Израиль тарапынан қаза тапқандар саны 700-ден асты, екі мыңға жуық адам жараланған, жүздеген адам хабар-ошарсыз кеткен. ХАМАС тобы көп адамды кепілге алып, Газаға әкеткен, олардың арасында балаларе, әйелдер, қарт адамдар бар.
Жексенбіде Израиль үкіметі ел соғыс жағдайына көшкенін жариялады. Резервте тұрған ондаған мың адам армия қатарына шақырту алды.
Израиль Газа секторымен шекараға 100 мың сарбаз шоғырландырды
"Біздің міндетіміз – осы соғыс аяқталғаннан кейін ХАМАС-ты енді қайтіп Израильдің бейбіт тұрғындарына ешқашан қауіп төндіре алмайтындай етіп әскери әлеуетінен айыру", – деді ол.
Израиль Газа секторында құрлықтағы операция жүргізетінін әлі ресми жариялаған жоқ.
Газа секторының денсаулық сақтау министрінің ақпараты бойынша, Израильдің қарымта шабуылынан 436 палестиндік қаза тауып, 2300-ден астам адам жараланған. БҰҰ-ның есебінше, 123 мыңнан астам адам тұрғын үй-жайын тастап, босып кетуге мәжбүр болған. Олардың көбі осы сектордағы халық ең тығыз орналасқан Газа қаласына қашып барған, 73 мыңға жуық адам мектептерді паналаған. Израиль Газа секторына электр жарығын, отын және тұтыну тауарларын жөнелтуді тоқтатты.
Дүйсенбі күні таңертең Израиль армиясы Газа секторындағы 500-ге жуық нысананы әуеден шабуылдап, жойғанын хабарлады.
Израиль армиясы қарулы радикалдар басып алған аумақты түгелдей қайтара алды ма, ол туралы әзірге ешқандай ресми ақпарат жоқ. Haaretz газеті әскери дерек көздеріне сүйеніп, ХАМАС тобының қарулы мүшелері ел аумағына әлі де "көптеп" кіріп жатыр деп хабарлады. Шекара бойындағы бірнеше елді мекенде атыс жалғасып жатыр.
ПІКІРЛЕР