Сіргелі қазақтары

1966 жылдан кейін Сіргеліде көптеген үйлер қайта салынып, жаңа көшелер пайда болды. Қыпшақ көшесінде тұрған мына үй сол кезде салынған.

Үй құрылысына әскер де тартылыпты. Жергілікті халық баспананың шұғыл түрде бес жыл мерзімге деп салынғанын, бірақ содан бері 50 жыл өткенін айтады.

Қыпшақ көшесін бойлай аққан су. Тұрғындардың сөзінше, Сіргелі де, басқа да ауылдар сулы жерлерде ірге көтерген.

Сіргелі жұрты әулие санайтын Әшірмат Оразов атты шайқының қабірі. 1961 жылы қайтыс болған шайқыны ауыл халқы ишан деп білген. Бұл зират қазір Сіргелінің ортасында шағын арал құсап қалған.

Сіргелінің Қыпшақ көшесінде тұрған аралас мектеп. Оқушылар өзбек және қазақ тілдерінде оқиды. Жергілікті тұрғындар бұл көшенің орнында бұрындары Қыпшақ ауылы болғанын айтады.

Сіргелі ауылындағы мектеп ауласында ойнап жүрген оқушы қыздар.

Сіргелідегі аралас мектептің оқу ісі бойынша меңгерушісі Гүлсара Тұрдымұратова физика және еңбек пәндерінен сабақ береді. Сынып бөлмесі оның оқушылары жасаған бұйымдарға толы.

7-сынып оқушысы Арыстан Саттаров.

Қазақ тілінде оқитын 7-сынып оқушылары Аслиддин Салибаев пен Асқар Қаппаров

7-сыныптың және бір оқушысы Әзиз Әкімбеков

Әбибулла Оразов соңғы 10 жыл бойы Қыпшақ махалласы комитетінің төрағасы болған.

Әуелі Сіргелі деп тұтас шағын ауданды емес, темір жол станциясын атаған. Бұл аудан арқылы темір жол өтеді. 

Сіргелі шағын ауданындағы Спутник қалашығының бір көрінісі.

Спутник қалашығы тұрғындарының бірі Рафик (сол жақта) "бәріміз бір атаның баласымыз" деп әзілдеп қояды. Мұнда да этникалық қазақтар аз тұрмайды.

Спутникке келгенімізде қайтыс болған отағасының жылын беріп жатқан үйдің үстінен түстік. Түрлі түсті реңкпен боялған үйдің ауласында тұрғындар қой сойып, ас әзірлеп жатты.

Сіргелінің жастары ас беріп жатқан бір үйге қазан әкеліп, жәрдем қылып жатыр. "Ұлтқа бөлінбейміз" дейді сол жақтағы жігіт.

1966 жылғы жер сілкінісінен соң Сіргелі ауданында салынған жаңа үйге көшірілген өзбек отбасылардың бірі сумаляк атты ұлтық асын пісіріп жатыр.

Сіргеліде қазақтардан бөлек бірнеше этникалық азшылық өкілдері тұрады. 

Қазақ отбасы тұратын пәтердің терезесі.

Шағын аудандағы ағаштан салынған үйлер "Спутник" деп аталып кеткен. Атау сол күйі өзгермей қалыпты.

Тып-тыныш аулалардың ар жағында қала өмірі қайнап жатқанына сену қиын.

Зілзаладан кейінгі баспана мәселесі арада 50 жыл өтсе де, әлі өзекті күйінде қалған. Әсіресе орыс тілді Ташкент тұрғындары жиі қоныс ауыстырып, пәтер іздеумен жүреді. Мынадай хабарландыру қабырғалары жиі кездеседі.