Балалар құқығы жөніндегі уәкіл Аружан Саин Алматыдағы тәртіпсіздік кезінде 11 жастағы балаға оқ тиіп, қайтыс болды деп мәлімдеді. Оның сөзінше, балаға 5 қаңтарда ата-анасымен көшеде жүргенде оқ тиген.
Саин Алматыдағы аурухананың бірінде оқ тиіп жараланған 15 жастағы баланың да жатқанын хабарлады. Оның әкесіне де оқ тиіп, ауруханаға түскен.
"Әкесі мен баласы көлікпен келе жатқанда содырлар оқ атқан" деді ол.
Саинның сөзін ҚазТАГ, Интерфакс ақпарат агенттіктері таратты.
Қазақстан билігі 6 қаңтарда елдегі тәртіпсіздік кезінде ұлттық гвардия күштік құрылымдардың 18 қызметкері қаза болып, 748-і зардап шеккенін айтқан. 7 қаңтарда ІІМ 26 "қарулы адамның" көзі жойылғанын, 26 "қылмыскер" жараланғанын мәлімдеді.
Билік "қарулы адамдардың", "содырлардың", "қылмыскерлердің" кім екенін ашып айтпай отыр.
ІІМ азаматтар арасында қанша адам қайтыс болғаны жайлы басқа ақпарат бермеді. Бірақ сайттар мен басқа да дереккөздердегі ақпараттардан қаза тапқандардың саны ресми деректен көп екенін байқауға болады.
8 қаңтарда The Jerusalem Post басылымы Израиль сыртқы істер министрлігіне сілтеме жасап, Алматыдағы тәртіпсіздік кезінде Израильдің 22 жастағы азаматы Леван Когиашвили қайтыс болғанын хабарлады.
Қазір Израиль үкіметі марқұмның мәйітін елге жеткізу жағын ұйымдастырып жатыр.
Қазақстан билігі 10 қаңтарды жалпыұлттық аза тұту күні деп жариялады.
- 2 қаңтарда Жаңаөзенде халық сұйытылған газ бағасының 60 теңгеден 120 теңгеге көтерілгеніне қарсы шыққан. Кейін Жаңаөзендегі наразылықты елдің басқа аймақтары да қолдады. Үкімет Маңғыстау облысында газ бағасы елу теңге болады деп шешім шығарса да, наразылық басылмады.
- Наразылар елдегі қымбатшылықты айтып, биліктің отставкасын және 1993 жылғы Конституцияны қайтаруды талап қылған.
- 5 қаңтар түнде Алматыда мыңдаған адам Республика алаңына жиналып, қымбатшылыққа қарсы наразылық білдірді. Полиция оларға қарсы көзден жас ағызатын газ, резеңке оқ, шулы граната қолданды. Елдің басқа аймақтарында да түнде наразылық жалғасты.
- 5 қаңтар түске таман президент Тоқаев үкімет отставкасын қабылдады. Елдің басқа аймақтарында - Ақтау, Шымкент, Ақтөбе, Өскемен, Семей, Оралда да наразылық жалғасты.
- 5 қаңтар түс ауа Алматыда тәртіпсіздік күшейіп, белгісіз адамдар тобы қала әкімдігінің ғимараты мен әуежайға басып кірді. Қала әкімдігінің өртке оранғаны көрінетін видеолар тарады. Алматыда ондаған сауда орындары, дүкендер, банктер тоналғаны хабарланды. Тоқаев 6 қаңтарда Қауіпсіздік кеңесі жиынында Алматыдағы шабуылға "террористік топтарды" айыптады. Бірақ ол айтқан "террористік топтардың" 2 қаңтардан бергі наразылыққа шыққандарға қатысы бар екеніне нақты дәлел жоқ.
- Қазақстан президенті "террористік бандиттер" деп атаған адамдардың кім екені белгісіз. Тоқаев оларды бұлай атауға қандай негіз болғанын, олардың қайдан келгенін, неге мұны "агрессия" деп есептейтінін анық айтпады. Кейінгі күндері Қазақстанда қандай да бір террорлық әрекеттер, әскери операция болып жатқаны жайлы ақпарат айтылмаған еді.
- 5 қаңтарда елде жағдай ушыққан тұста Тоқаев ҰҚШҰ-дан көмек сұрады. Ұйымға мүше Ресей, Армения, Беларусь Қазақстанға көмекке әскер жіберетіндерін мәлімдеді. 6 қаңтар кешкісін ресейлік әскерилер елге жетті.
- Билік елде толығымен төтенше жағдай жариялаған.
- 7 қаңтарда Тоқаев "содырларға оқ атуға бұйрық бергенін" мәлімдеді. Ал 8 қаңтарда ҰҚК бұрынғы басшысы Кәрім Мәсімов "мемлекетке опасыздық жасау" айыбымен ұсталды.
ПІКІРЛЕР