Премьер-министр Әлихан Смайылов "АрселорМиттал Теміртау" компаниясын өндірісті жаңарту және инвестиция тарту мәселесі бойынша алған міндеттемелерін орындамады деп айыптады. Сенбі күні Смайылов екі күн бұрын өрт болған Шахтинск қаласына келді. Мұнда "Қазақстан" шахтасындағы өрттен кемінде үш кенші қаза болған, екі адамды іздеу жұмыстары жүргізіліп жатыр.
Премьер оқиғаны өнеркәсіп саласында ережелердің сақталмауымен тікелей байланыстырды.
"Бұған бірінші кезекте кәсіпорын иелері кінәлі. Олардың компания қызметінен мүлде хабарсыз болуы бірнеше жылдан бері қайғылы оқиғаларға әкеліп жатыр. Көріп отырғанымыздай, осы уақыт бойы жұмысшыларға тиісті дәрежеде жағдай жасалмай, тек пайда табуға ғана назар аударылып келген. Сондықтан апаттар жиілеп жатыр" деді Әлихан Смайылов.
Оның айтуынша, әрбір ірі апаттан кейін компания еңбек жағдайын қауіпсіз ету мақсатында шара қолданғанын айтады, алайда жағдай өзгермей отыр.
"Соңғы 15 жылда "АрселорМиттал Теміртау" нысандарында жүзден астам адам қаза болған. Бұл көрсеткіш барған сайын артып барады. "АрселорМиттал" халықаралық компаниялар тобындағы әрбір екінші адам өлімі Қазақстанда болып жатыр" деді Смайылов.
Оның сөзінше, компания өндірісті жаңартпағандықтан металлургия комбинаты тозып жатыр, жекешелендіруден кейін оның өндіріс көрсеткіштері екі есеге төмендеген, ал көмір өндірісі шамамен 25 пайызға қысқарған. Шенеунік "АрселорМиттал Теміртау" орналасқан Теміртау қаласының экологиясы да нашар екенін атап өтті. Ақпаратқа қарағанда, Теміртау ауасының ластануына бірінші кезекте АМТ металл комбинаты әсер етіп отыр.
"Өндіріс қауіпсіздігіне деген көзқарасын ескерген үкімет бұл инвестордың Қазақстанда болғанын кұп көрмейді" деді ол.
"АрселорМиттал Теміртау" компаниясы шахтадағы өрттен кейін қаза болған жұмысшылардың отбасына көмектесуге уәде берген. Компания өрттің себебін анықтау бойынша мемлекеттік органдарға көмектесетінін де айтқан.
18 тамыз күнгі Шахтинскідегі брифинг кезінде журналистер "АрселорМиттал Теміртау" өкілі Сергей Огайдан көмір шахтасы мен металл комбинатын мемлекет меншігіне қайтару мүмкіндігі туралы сұраған. Огай бұл сұраққа жауап беруге өкілеті жетпейтінін айтты. "Еуропада тұратын миллиардер Лакшми Миттал қайғылы оқиғалар болған кезде неге Қазақстанға келмейді?" деген сұраққа Огай акционер өкілдері "жағдайдан хабардар" деп қысқа қайырды.
Президенттің баспасөз қызметі 17 тамызда "шетелдік компанияға тиесілі кәсіпорындарда жиі қайталанатын апаттар олардың инвестициялық және өзге де міндеттемелерін өрескел бұзғанын көрсетеді. Аталған жағдайлар олардың Қазақстан нарығында қызмет етуіне қатысты шешім шығаруға ықпал етеді" деген хабар таратты.
2022 жылы бірнеше апаттан кейін де осыған ұқсас мәлімдемелер айтылған, алайда компания әлі күнге дейін жұмыс істеп келеді. 1995 жылы жекешелендіру науқаны кезінде онымен жасалған келісімшарт жарияланған жоқ.
