"Оқ самайына тиіп, миын жанап өткен"
Айдос Садықовқа кеше, 18 маусымда Киевтегі аурухананың біріндегі нейрохирургия бөлімінде жасалған операция екі жарым сағатқа созылған. Бұл жөнінде Айдос Садықовтың әйелі, журналист Наталья Садықова Азаттыққа берген сұхбатында айтты.
– Оқ самайына тиіп, миын жанап өткен. Кеше жансақтау бөліміне кіріп шықтым, жағдайы өте ауыр. Дәрігерлер екіұдай болжам жасап отыр. Бүгінгі түннен аман қалса, тағы бақылаймыз деді. Жансақтау бөліміне кіргенімде Айдос естімеді, бірақ оған өлмеші деп жалындым. Мені естіген сияқты, себебі бүгін [19 маусымда] таңертең Киев уақытымен [таңертеңгі] 7-де ауруханаға хабарласқанымда, "түннен аман шықты" деп айтты, – деді Наталья Садықова.
Оның сөзінше, Украина ұлттық полициясының басшысы Иван Выговский жағдайды жеке бақылауына алатынын айтқан.
Тоқаев: Қазақстан тергеуге қатысуға дайын
Наталья Садықова Азаттыққа берген сұхбатында "Бәсе" арнасы Ақорданың тамағына қадалған қылтанақтай болды" дей келе, қастандық артында билік тұр деп есептейтінін айтты. Азаттық Садықованың бұл сөзін тәуелсіз тұрғыдан тексере алмайды. Қазір қылмысты тергеу жалғасып жатыр.
19 маусымда Ақордада су тасқынымен күреске белсене атсалысқан азаматтарды марапаттау рәсімінде Қазақстан президенті Қасым-Жомарт Тоқаев сейсенбіде Киевте Айдос Садықовқа жасалған қастандыққа қатысты мәлімдеме жасаған. Тоқаев дипломатиялық арналар мен құқық қорғау органдары арқылы "оқыс оқиғаға байланысты ресми сауалдар жолдау жөнінде нақты тапсырма бергенін" айтты. Ол Қазақстанның ресми органдары "қажет болса істің ақиқатына жетуге жәрдем беру үшін тергеуге қатысуға дайын екенін" де мәлімдеді.
"Қоғамдағы барлық қарама-қайшылық пен келіспеушілік тек құқықтық тұрғыдан, яғни тиісті заңнамаға және негізгі халықаралық нормаларға сәйкес шешу қажет. Кеше Қазақстан азаматы Айдос Садықовқа қатысты Киевте болған қылмысқа да дәл осы ұстаным тұрғысынан қараған жөн" деген Тоқаевтың сөзін Ақорда сайты жариялады.
Ерлі-зайыпты Садықовтар: белсенділігі, Қазақстаннан Украинаға кетуі
2014 жылы Қазақстан парламентінің экс-депутаты Марат Итеғұловтың шағымы бойынша Наталья Садықованың үстінен қылмыстық іс қозғалған соң ерлі-зайыпты Айдос және Наталья Садықовтар Ақтөбеден Киевке кеткен. Итеғұлов журналист Садықова лақап атпен оппозициялық газетке жазған мақаласында "жала жапты" деп, сотқа арызданған.
Былтыр Қазақстан үкіметі Айдос пен Наталья Садықовтарды "араздық қоздырды" деп айыптап, екеуіне іздеу жариялаған. Айдос Садықов Азаттыққа берген сұхбатында әйелі екеуіне жарияланған іздеудің "саяси астары" барын айтқан. Ерлі-зайыпты Садықовтар 2014 жылдан бері интернетте "Бәсе" арнасын тұрақты түрде жүргізіп, Қазақстан билігін сынайтын видеолар жариялап жүр.
Қазақстан билігі Айдос Садықовтың үстінен бірнеше рет қылмыстық іс қозғаған. 2010 жылы оған "Бұзақылық" бабы бойынша айып тағылып, белсенді екі жылға сотталған. Айдос жазасын қамау мекемесінде өтеп, 2012 жылы рақымшылықпен бостандыққа шыққан. Садықов пен жақтастары ол істі билік қолдан ұйымдастырды деген еді.
Айдос Садықов 2010 жылға дейін "Азат" жалпыұлттық социал демократиялық партиясының Ақтөбе филиалының жетекшісі болды. Сол жылы ол бұл партиядан шығып, "Гастат" атты қоғамдық қозғалыс құрды. Ол қозғалыс қытайлық "СНПС-Ақтөбемұнайгаз" компаниясында тәуелсіз кәсіподақ ұйымы құрылуына мұрындық болды. Садықов мұнайшылар құқығы бұзылмауын талап еткен акциялар өткізіп көзге түскен.
Украинада босқын мәртебесін алған Айдос пен Наталья Садықовтар 2014 жылдан бері балаларымен бірге Киевте тұрып жатыр.
Депутат Бапи: Үшінші күштердің от салу әрекеті
Мәжіліс депутаты Ермұрат Бапи Киевтегі қазақстандық оппозициялық белсенді Айдос Садықовқа жасалған қастандықты "әлдебір үшінші күштердің Қазақстан мен басқа елдердің арасына от салу әрекеті" деп ойлайды.
"Қазақстан тарапы Украинаның тергеу және басқа орындарына шығып, істің мән-жайын анықтауды сұрауы керек деп ойлаймын. Талап етуіне де болады. Себебі Айдос – Қазақстан азаматы. Ел билігі өз азаматын қай жерде жүрсе де қорғауы керек, оның мүддесін жақтауы керек қой", – деді Бапи.
Журналистердің бірі "Садықовтар көзқарасына байланысты елден қашты, Қазақстан олардың сөзін сөйлей ме?" деп сұрады.
Бапи "бұл жерде Садықовтардың саяси-кәсіби көзқарасы қалай болғаны маңызды емес. Ең маңыздысы – ол Қазақстан азаматы", – деді.
ПІКІРЛЕР