"БАЛАПАНЫМ, СЕНІ ҚОРҒАЙ АЛМАДЫМ!"
Түркістан облысы Сарыағаш ауданы Жібек жолы ауылында кісі қолынан мерт болған бес жасар сәбиді туыстары мен ауылдастары 14 шілдеде жергілікті уақытпен сағат 14-те жерледі.
Қызды мәйітханадан таңертеңгі сағат 11:00 шамасында үйіне алып келді. Ішке бөтен адамды кіргізбеді. Ет жақын туыстарына ғана көрсетті. Жақындары денесі тұтас оралып тасталған қыздың жүзі ғана ашық екенін, бір бері қанталағаны байқалатынын айтты.
Қызының денесін көргеннен кейін кешеден бері қайғыдан қан жұтып есі кіресілі-шығасылы жүрген анасы қайта-қайта талықси берді. Қаралы үйге жиналған әйелдер сол жерде жүрген полиция мен әкімдік қызметкерлерінен күдіктіні беруді талап етті. Олар жоғалған баланы іздеу кезіндегі полицияның әрекетсіздігін айтып, кінәлады.
Кісі қолынан қаза болған баланың жаназасы сағат 14:00 шамасында үйге жақын жердегі мешіттен шығарылды. Мәйітті үйден шығаратын кезде отбасының кейбір туыстары орауын шешіп, денесін видеоға түсіріп алу керек деп айтты. Бірақ азаматтық киім киген әлдебір адамдар қыздың әкесін мәйітті мазаламауға шақырып, оны көндірді.
Сүйекті үйден ақтық сапарға алып шыққан сәтте артынан "Балапаным, сені қорғай алмадым!" деп зар еңіреп жүгірген анасы талықсып кетті. Таңнан бері осында отырған жедел жәрдем қызметкерлері оған тағы көмектесті.
Сәбиін жоқтаған қаралы ананың дауысы естіген адамның сай-сүйегін сырқыратты, жиналған әйелдердің бәрі қосыла жылады. Ер азаматтардың арасында да көзіне жас алғандар аз болған жоқ.
"АСҚАН ҚАТЫГЕЗДІКПЕН ӨЛТІРГЕН"
Жібек жолы ауылында 13 шілдеде түс әлпетінде үйінен сыртқа шығып кетіп, ізім-ғайым жоғалған бес жасар қызды әуелі үй-іші, кейін жұрт болып бірнеше сағат іздеген.
– Сағат 13:04 кезінде үйден шықты. Шамамен 5-6 минуттан соң таба алмай қалдым. Төңіректі түгел шолып, бүкіл ауылды араладық. Ауыл адамдарды жабылып іздеуге кірістік, – деді баланың анасы Азаттыққа.
Сәбидің әкесі екі үйден кейін тұратын, бұрын сотталған көршісінен күдіктеніп, бейсенбі күні оның үйіне екі рет барғанымен, қызын таба алмаған. Бір топ адам көршісінің үйіне үшінші рет барғанда қыздың көйлегін көріп қалып, үйді толық тінтіген.
– Қызымның денесін кешкі сағат тоғыз шамасында шатырдан таптық. Сау-тамтығы қалмаған. Ойына келгенін істеп, жеті-сегіз жерінен пышақтап, асқан жауыздықпен өлтірген, – деді баланың әкесі.
– Бұрын сотталғанын, кейін тағы бір ауыр қылмыстық істен құтылып кеткенін білетінбіз... Құқық қорғау органдары қылмыскерді лайықты жазаласа осындай сұмдық болар ма еді? Оны бостандыққа шығарып жіберген қызметкерлерді тауып, жазалауды талап етемін! – деді қайғыдан қан жұтып отырған әке.
Жоғалған қызды бірінші болып өзгелермен бірге оны іздеуге шыққан ауыл тұрғыны Ержан Ахметов тапқан.
Ержан Ахметовтің Азаттыққа айтуынша, шатырға шығып, сонда жатқан шиферді басып қалғанда, астында әлдебір зат барын байқаған. Ашып қалғанда қыздың жансыз жатқанын көрген
"Одан ары не болғанын білмеймін" деді ол.
Өлген сәбидің ата-анасы қазір күдікке ілініп отырған көршісімен араздығы болмағанын, аралас-құраластығы да жоғын айтты.
Ауыл адамдары қызды тапқан кезде полиция да келіп, баланың сүйегін Сарыағаш ауданымен іргелес Келес ауданының мәйітханасына әкеткен.
Жібек жолы ауылын бала өлтіру қылмысы дүр сілкіндірді
АШУЛЫ ЖҰРТ КҮДІКТІНІ БЕРУДІ ТАЛАП ЕТТІ
13 шілде кешке полиция кішкентай баланың қазасына күдікті адамды қамауға алған.
Суық хабарды естіп жиналған, ашу-ызаға булыққан жұрт күдіктіні өздеріне беруді талап етіп, наразылық білдірген. Олар күдіктіні әкетіп бара жатқан полициямен шекісіп, арада қақтығыс болған.
Жергілікті халық Жібек жолы ауылында қазір интернет ажыратылғанын айтты. Түн ішінде осы ауылдағы Қазақстан мен Өзбекстан арасындағы шекара пункті жабылған.
ПОЛИЦИЯ: АДАМ ӨЛТІРУ БАБЫ БОЙЫНША ІС ҚОЗҒАЛДЫ
Жібек жолы ауылында бес жасар сәби кісі қолынан мерт болған және ауыл тұрғындары күдіктіні беруді талап етіп жиналған деген суыт хабар әлеуметтік желіде түнде тарап, жұма күні таңертең ресми органдар әлгіндей оқиға болғанын растады.
Полиция таратқан ақпаратта "Жібек жолы ауылы Амангелді көшесіндегі тұрғын үйдің ауласында орналасқан сарайдың үстінен денесінің бірнеше жерінде өткір затпен салынған жарақат іздері бар кәмелетке толмаған Е.Н. өлі табылғаны" айтылған.
Жұма күні алматылық журналист Михаил Козачков телеграм-арнасына осы оқиғаға қатысы болуы мүмкін видео жариялады. Журналист видеоға "2018 жылы туған қыздың денесі жергілікті тұрғынның үйінен табылған. Ауыл адамдары күдіктіні полициядан тартып алуға тырысқан, бірақ полиция күдіктіні алып кеткен" деген түсініктеме жазған.
Түркістан облыстық полиция департаментінің баспасөз қызметі Қылмыстық кодекстің 99-бабы ("Адам өлтіру") бойынша іс қозғалып, тергеу басталғанын хабарлады.
Қазақстан президенті Қасым-Жомарт Тоқаев бас прокуратура мен ішкі істер министрлігіне Сарағаштағы бес жасар қыздың өліміне байланысты оқиғаның мән-жайын мұқият тексеруді тапсырған.
Ақорданың мәліметінше, күдікті бұған дейін кісі өлтіргені үшін 10 жылға сотталған. Биыл сот "адам денсаулығына қасақана ауыр зиян келтіргені үшін" күдіктінің бостандығын 3 жылға шектеген.
ПІКІРЛЕР