Сол айтыста сөз сайыстырған өскемендік Аслан Ғафуров пен астаналық Әсем Ережеқызы ежелден бір-бірінің сырына қанық екендерін танытып, айтыстың өн бойында жеңіл әзілмен қағытып қана отырды.
Айтысты бастаған сәттегі Аслан Ғафуровтың:
– Ұлы Абай аласармас асқарымыз,
Мәңгілік таусылмайтын дастанымыз.
...Ақындар, біздер үшін асқан бақыт,
Киелі топырақты басқанымыз, – іспетті алдын ала дайындап келген арнау өлеңдерінен басқа қоғамдық тақырыптар мен әлеуметтік мәселерге қатысты айтылған сөз ақын жырынан кездеспеді.
Ал Әсем Ережеқызы қарсыласының қара басын ғана сөз етті:
– Дедің-ау «сені көріп қобалжыдым»,
Табыласың сен ылғи осы арнадан.
...Сен де сол иі жұмсақ жігіт еді,
«Жоқ» деген қыз сөзінен аса алмаған.
Қыз күнгі «балқаймағым» деп айтардай,
Жарытып сөз айтып ең қашан маған.
Дидар мен Төреғали он сегізде,
Біздерге жеңеше деп қақаңдаған.
Ал Аслан бәз-баяғы қалпында отыр,
Жинақтап тәжірибе жасанбаған.
Бұл қызық жігіт екен, отыз беске
Келсе де, қобалжуын баса алмаған, – деп, қыз бен жігіт айтысы үлгісімен шектелді.
