Қарашаның 3-і күні Қазақстан президенті Нұрсұлтан Назарбаев Өзбекстан астанасына жұмыс сапарымен барып, Өзбекстан президенті Ислам Кәрімовпен кездесті деп хабарлайды Қазақстан президентінің әкімшілігінің баспасөз қызметі. Ташкенде екі мемлекет басшыларының қатысуымен Мемлекетаралық Үйлестіру Кеңесінің бірінші отырысы өткен. Президент әкімшілігі кездесу кезінде екі жақты қарым-қатынасқа қатысты кең ауқымды мәселелер талқыланып, аймақтағы жағдай бойынша президенттердің пікір алмасқанын айтады. Ал тәуелсіз сарапшылар болса, Нұрсұлтан Назарбаевтың Өзбекстанға алдын-ала хабарланбай, кенеттен сапар шегуін көрші Қырғызстандағы оқиғалармен тікелей байланыстырады. Мәселен, саясаттанушы Эдуард Полетаев егер Қырғызстандағы оқиға бақылудан шығып бара жатса, Орталық Азиялық екі ел – Қазақстан мен Өзбекстан бітімгершілік күшпен де көмек көрсетуі мүмкін дейді.
